ទីម័រខាងកើតក្លាយជាសមាជិកទី១១របស់អាស៊ាន
សម្តេច ហ៊ុន សែន ប្រធានព្រឹទ្ធសភាកម្ពុជា នៅថ្ងៃទី២៦ តុលា បានចេញសារលិខិតអបអរសាទរ ទីម័រខាងកើត ដែលបានក្លាយជាសមាជិកផ្លូវការទី១១ របស់អាស៊ាន ហើយបានស្វាគមន៍យ៉ាងកក់ក្តៅចំពោះសមិទ្ធផលនេះ។ ក្នុងសារលិខិតនោះ សម្តេច ហ៊ុន សែន បានចាត់ទុកការចូលរួមជាសមាជិកពេញសិទ្ធិរបស់ទីម័រខាងកើតថា មានសារៈសំខាន់ និងទាន់ពេលវេលា សម្រាប់ការពង្រឹងឯកភាពរបស់សមាគមអាស៊ាន ក្នុងបរិបទពិភពលោកដែលកាន់តែស្មុគស្មាញ។ លោកក៏បានលើកឡើងថា ការចូលរួមរបស់ទីម័រខាងកើតក្នុងសហគមន៍អាស៊ាន នឹងរួមចំណែកដល់ចក្ខុវិស័យតំបន់មួយប្រកបដោយសន្តិភាព ភាពធន់ និងវិបុលភាព។ អត្ថបទក៏រំលឹកថា នៅពេលកម្ពុជាធ្វើជាម្ចាស់ផ្ទះកិច្ចប្រជុំកំពូលអាស៊ានឆ្នាំ២០២២ កម្ពុជាបានយល់ព្រមជាគោលការណ៍ទទួលយកទីម័រខាងកើតជាសមាជិកទី១១ និងផ្តល់ឋានៈអ្នកសង្កេតការណ៍ឱ្យចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀត។ គួរបញ្ជាក់ថា ទីម័រឡេស្តេ បានក្លាយជាសមាជិកទី១១ នៃអាស៊ានជាផ្លូវការ នៅព្រឹកថ្ងៃទី២៦ ខែតុលា ឆ្នាំ២០២៥ ក្នុងកិច្ចប្រជុំកំពូលអាស៊ានលើកទី៤៧ នៅទីក្រុងកូឡាឡាំពួ ប្រទេសម៉ាឡេស៊ី។